Ba nida niyyar cin mutuncin Kwankwaso, mutane ne suke ingizani cewar gwamna Abba.
Gwamnan jihar Kano, Abba Kabir Yusuf, ya fito fili ya karyata rade-radin da ake na cewa akwai baraka tsakaninsa da ubangidansa kuma jagoran tafiyar Kwankwasiyya, Sanata Rabiu Musa Kwankwaso.
A wata zantawa da ya yi da ‘yan jarida a Kano, a yammacin ranar Laraba, Yusuf ya yi tsokaci kan cece-kuce da kuma jita-jita na rashin jituwa, inda ya jaddada cewa dangantakarsa da Kwankwaso tana nan daram da kuma mutuntawa, kamar yadda ta kasance a shekaru 40 da suka gabata.
Jita-jita a cikin tafiyar Kwankwasiyya da kuma jam’iyyar New Nigeria People’s Party (NNPP) sun yi zargin cewa Kwankwaso yana yin tasiri fiye da kima kan gwamnatin Yusuf, inda wasu ke ikirarin cewa shi ne ke yanke hukunci kan manufofinsa, inda ya yi tazarce a karo na uku ta hanyar wakili.
Aliyu Sani Madakin-Gini, dan majalisar wakilai mai wakiltar mazabar Dala ta tarayya, wanda a kwanakin baya suka yi mubaya’a tare da Kwankwaso, ya yi zargin cewa tikitin Gwamna Yusuf da Kwankwaso ya samo asali ne daga cece-kuce a kan kwangilar sayar da magunguna da kuma shirin bayar da tallafin karatu da jihar ke yi.
Yusuf, ya yi watsi da zarge-zargen, inda ya jaddada ‘yancin cin gashin kansa tare da nuna godiyarsa da biyayyarsa ga Kwankwaso.
Babu kanshin gaskiya a cikin rade-radin rashin fahimtar juna a tsakaninmu, inji Yusuf.
A cikin shekaru 40 na saninsa, gaya mani, a cikin ’yan siyasa wa ya zauna da wani tsawon wannan lokaci kuma har yanzu ya ci gaba da zaman lafiya? Lokacin da yake gwamna, na yi aiki a matsayin mai taimaka masa, a koyaushe ina tare da shi. A tsawon wadannan shekaru, ba mu taba samun baraka ba. Don yanzu a ce an daure ni a sarka da Kwankwaso kawai rashin adalci ne.
