Kungiyar Arewa maso Gabas ta yaba wa kokarin Bello Matawalle na yaki da rashin tsaro.
Kungiyar Arewa maso Gabashin Nijeriya ta yaba wa Ministan kasa a ma’aikatar tsaro Dr Bello Matawalle, bisa jajircewarsa na magance matsalar rashin tsaro a yankin.
A wata sanarwa da ya sanya wa hannu a birnin Maiduguri a ranar Litinin da ta gabata, mai magana da yawun kungiyar, Bukar Babagana, ya ce tun bayan nada shi mukamin minista, Bello Matawalle, ya gaza zaune ya gaza tsaye sai ya ga matsalar tsaro ta kaura a sassan Nijeriya.
“Muna bayan Dr Bello Matawalle, tare da amincewa da namijin kokarinsa na yaki da rashin tsaro da samar da zaman lafiya a yankin.”
A cewarsa, a wata ziyarar da ya kai jihar Borno, Matawalle ya nuna jajircewarsa ta hanyar daukar kwararan matakai da nufin mayar da rashin tsaro ya zama tarihi.
Kungiyar ta yi nuni da cewa, wannan aiki ya nuna gagarumin sauyi a yankin, inda ya mayar da yankunan da a da ke fama da tashin hankali zuwa wuraren da za a iya zuba jari.
“Tasirin jagorancin Minista Matawalle a bayyane yake,” in ji wakilin kungiyar tare da lura da raguwar ayyukan ‘yan bindiga da mayakan Boko Haram. Yunkurin da ake ci gaba da yi ya haifar da ingantaccen yanayin tsaro, tare da ƙarfafa ‘yan kasuwa su ɗauki yankin a matsayin zaɓi mai dacewa don saka hannun jari.
Kungiyar Arewa maso Gabas ta nuna godiya ga shugaban kasa Bola Ahmed Tinubu bisa amincewa da gogewar Matawalle tare da sanya shi cikin gwamnatinsa. Wannan haɗin guiwa ya kasance mai muhimmanci wajen magance matsalolin tsaro da suka daɗe suna addabar yankin.
Idan aka yi la’akari da zaman da ya yi a baya a matsayin Gwamnan Jihar Zamfara, za a iya cewa matakan tsaro da Matawalle ya dauka sun kafa ginshiki mai karfi kan ayyukan da yake yi a halin yanzu. Ana ganin kwarewarsa ta baya a matsayin kadara mai kima a ci gaba da yakar rashin tsaro.
Rahotanni sun ce mazauna yankin Arewa maso Gabas sun ji sauye-sauye masu kyau, inda da yawa ke bayyana fatar samun ci gaba. Kungiyar ta yi hasashen ci gaba da samun ci gaba a yakin da ake da rashin tsaro, da samar da yanayi mai aminci ga kowa.
Kungiyar Arewa maso Gabas ta sake jaddada goyon bayanta ga kokarin Matawalle, tare da jaddada muhimmancin ci gaba da kasancewarsa a yankin. Sun bayyana kwarin guiwar cewa shugabancinsa zai kara inganta matakan tsaro da kuma jawo zuba hannun jari.
Yayin da jihar Borno ta fita daga cikin mawuyacin halin da take ciki, kungiyar ta jajirce wajen yin aiki tare da ministan domin tabbatar da dorewar ci gaban tsaro da bunkasar tattalin arziki. Ana kallon sauye-sauyen yankin a matsayin shaida na kokarin hadin guiwa tsakanin gwamnati da masu ruwa da tsaki na al’umma.
